Dieci… ve sìo domandà cossa ca vol dire?
Diese minuti de spettacolo?
Diese episodi?
El voto ca s’emo dà?
O, forse, diese ani ca semo insieme?
Se coalchedun gà pensà coèsto, l’à vinto… una calda stretta di mano.
Ghemo riscumizià nel ‘98… ghivino lassà lì nel ‘75… e coèsto a lo saì zà. L’inportante, però, l’è che adesso, nel 2007, a semo ancora coèi… quasi, parchè i ani ca passa gà pegiorà la situazion. Se la sclerosi la scumizia a 25/30 ani… semo zà capìo.
Par fortuna, nel corso storico, ghè vegnù dentro d’i zoveni. Alcuni iè ‘ndà via dopo poco, altri iè restà, deventando sclerotici come i veci. Veci, nel senso che iè el grupo storico. E i novi, più o meno, i s’à adeguà ala mentalità.
Detto questo, coss’è ca femo?
Provemo a ripercorrere la nostra storia. A voi il giudizio finale.
Ghivino anca pensà da lassar lì. Ma dopo tanti spettacoli fati in giro, visto che la zente la se sbigatava dal ridare, ghemo pensà che l’è on pecà molare tuto. Ghemo capio ca femo on servizio socialmente utile: tirare su de morale la zente depressa da coèlo che la vede e la sente par television e non solo. Però, per la suddetta sclerosi, a semo on fià scarsi de idee… d’altra parte l’è naturale dopo dies’ani…
E alora ghemo dito: intanto femo coèsto, pol darsi che col tenpo torna le idee e sopratuto la voja.